Vivide et contrectabiliter

Adumbratio et historia congregationis

Acroaseis musicae a mense Septembri usque ad Maium et quidem diebus Veneris ac Saturni celebrantur. Primo quoque die Martis grex amatorum musicae afroamericanae convenit. Mense Iunio ac Iulio symphoniae variae sub caelo apparantur. Ad ista acroamata omnes amicos fanaticos consectatores invitare volumus. Concentus praestigiis ac ludis scenicis alternantur varianturque.

Circulus noster ad CCCLXX consectatores habet. Nostrum interest magnam variationem deliciarum musicarum praebere. Itaque coryphaeis et nationalibus et internationalibus offerendis studemus:

c. a. Barbara Dennerlein, Dusko Goykowich, Ack van Rooyen,
Albert Mangelsdorff , Klaus Doldinger, Hendrik Meurkens,
Aladar Pege, Attila Zoller, Deborah Henson, Gunter Hampel,
Ali Haurand, Klaus Ignatzek, Heinz Sauer, Lulu Weiß,
Katie Webster, Willi Little Littlefield, Joe Kienemann, Yuko Gulda,
Bill Ramsey, Joe Haider, Klaus Kreuzeder, Joe Viera, Herb Geller,
Lee Konitz, Simon Nabatov, Abraham Burton, Earny Watts,
Masha Bijlsma, Ricky Ford, Carla Cook, Charly Antolini, Benny Bailey,
Frank Lacy, John Hicks, Lili White, Jimmy Cobb, Philipp Catherine etc.

                             Petra et Elisabeth

Genius loci cellarii convivas mira aequanimitate afficere solet, qualis alibi
haud facile invenitur. Hic et musicae spiritus et spiritus vini cerevisiaeque
gustantur, quarum potionum varia largitudo suppetit.

Res gestae circuli nostri

In Bambergensium civitate ambitiones musicae afroamericanae diu quasi delirabant, quin recta ad formam institutionis niterentur. Abhinc XL annis secta amatorum musicae afroamericanae ratione valde enthusiastica sed male ordinata agitabat. Assectatores primordiales haud nesciunt, quibus locis conventum sit (in deversorio ‘Venatoris’, in taberna ‘ad Rosam Agrestem’, in catacomba ‘Leopoldiana’), qualia impedimenta atque incommoda superanda atque toleranda fuerint. Attamen musicae amor ac ardor creverunt magis magisque et primos triumphos egerunt.

At primo lustro octavi decennii prioris saeculi ardor ille aliquantum restinguebatur, dum proclamatiuncula in actis diurnis (quae Franconicus Dies nominantur) reddita iterum inflammatus est.

Initio nisi manipulus circum Randolfum Johannem conglobatus nemo inventus est qui crederet, civitatem Bambergensem se alio genere musicae ornare posse quam illo Beethoviorum et Brahmsiorum, quod quasi cothurnatum magnifice incedit et recusat, quominus sub aliis nisi basilicis tectis versetur accipiaturque. Fundatoribus consilium perfectissimum et omnibus numeris absolutum ante oculos obversatum est: animum veterem sodalitatum popularium et lucri studium vitandum, attractionem iuvenum petendam, macello symphoniarum conventionalium atque venalium supplemento esse oportere.

A.d. XV Kalendas Octobres anni MCMLXXIV cives fere C convenerunt quasi quandam contionem legiferam constituentes. Haec multitudo sodalium (pro rata parte spectabilis) statuit congregationem ‘Jazzclub Bbg. e.V.’ tabulis collegiorum inscribendam esse. Inscriptio denique mense Iannuario anni proximi facta est.

Biennio post societas praedium proprium in via ‘Harenaria’ situm - quamvis proclive sartu - acquisivit. Multi sodales voluntarii in aedificio restituendo collaboraverunt. Quibus voluntariis gratiam debemus, quod machina lucifera fungi, ventilatione artificiosa frui, sedilibus commodis uti possumus.